• Skip to main content
  • Skip to secondary menu
  • Skip to primary sidebar
  • Skip to footer

Poetry Catalog

We honor great poets. We honor great poetry.

  • Home
  • About
  • Contact
  • Submit Your Work
  • Writers
  • Advertising / Subscription

The Auld Farmer’s New-Year Morning Salutation to His Auld Mare, Maggie, By: Robert Burns

October 18, 2026 by Editors

pc

On giving her the accustomed ripp of corn to hansel in the New Year.

A Guid New-year I wish thee, Maggie!
Hae, there’s a ripp to thy auld baggie:
Tho’ thou’s howe-backit now, an’ knaggie,
I’ve seen the day
Thou could hae gaen like ony staggie,
Out-owre the lay.

Tho’ now thou’s dowie, stiff, an’ crazy,
An’ thy auld hide as white’s a daisie,
I’ve seen thee dappl’t, sleek an’ glaizie,
A bonie gray:
He should been tight that daur’t to raize thee,
Ance in a day.

Thou ance was i’ the foremost rank,
A filly buirdly, steeve, an’ swank;
An’ set weel down a shapely shank,
As e’er tread yird;
An’ could hae flown out-owre a stank,
Like ony bird.

It’s now some nine-an’-twenty year,
Sin’ thou was my guid-father’s mear;
He gied me thee, o’ tocher clear,
An’ fifty mark;
Tho’ it was sma’, ’twas weel-won gear,
An’ thou was stark.

When first I gaed to woo my Jenny,
Ye then was trotting wi’ your minnie:
Tho’ ye was trickie, slee, an’ funnie,
Ye ne’er was donsie;
But hamely, tawie, quiet, an’ cannie,
An’ unco sonsie.

That day, ye pranc’d wi’ muckle pride,
When ye bure hame my bonie bride:
An’ sweet an’ gracefu’ she did ride,
Wi’ maiden air!
Kyle-Stewart I could bragged wide
For sic a pair.

Tho’ now ye dow but hoyte and hobble,
An’ wintle like a saumont coble,
That day, ye was a jinker noble,
For heels an’ win’!
An’ ran them till they a’ did wauble,
Far, far, behin’!

When thou an’ I were young an’ skeigh,
An’ stable-meals at fairs were dreigh,
How thou wad prance, and snore, an’ skreigh
An’ tak the road!
Town’s-bodies ran, an’ stood abeigh,
An’ ca’t thee mad.

When thou was corn’t, an’ I was mellow,
We took the road aye like a swallow:
At brooses thou had ne’er a fellow,
For pith an’ speed;
But ev’ry tail thou pay’t them hollowm
Whare’er thou gaed.

The sma’, droop-rumpl’t, hunter cattle
Might aiblins waur’t thee for a brattle;
But sax Scotch mile, thou try’t their mettle,
An’ gar’t them whaizle:
Nae whip nor spur, but just a wattle
O’ saugh or hazel.

Thou was a noble fittie-lan’,
As e’er in tug or tow was drawn!
Aft thee an’ I, in aught hours’ gaun,
In guid March-weather,
Hae turn’d sax rood beside our han’,
For days thegither.

Thou never braing’t, an’ fetch’t, an’ fliskit;
But thy auld tail thou wad hae whiskit,
An’ spread abreed thy weel-fill’d brisket,
Wi’ pith an’ power;
Till sprittie knowes wad rair’t an’ riskit
An’ slypet owre.

When frosts lay lang, an’ snaws were deep,
An’ threaten’d labour back to keep,
I gied thy cog a wee bit heap
Aboon the timmer:
I ken’d my Maggie wad na sleep,
For that, or simmer.

In cart or car thou never reestit;
The steyest brae thou wad hae fac’t it;
Thou never lap, an’ sten’t, and breastit,
Then stood to blaw;
But just thy step a wee thing hastit,
Thou snoov’t awa.

My pleugh is now thy bairn-time a’,
Four gallant brutes as e’er did draw;
Forbye sax mae I’ve sell’t awa,
That thou hast nurst:
They drew me thretteen pund an’ twa,
The vera warst.

Mony a sair daurk we twa hae wrought,
An’ wi’ the weary warl’ fought!
An’ mony an anxious day, I thought
We wad be beat!
Yet here to crazy age we’re brought,
Wi’ something yet.

An’ think na’, my auld trusty servan’,
That now perhaps thou’s less deservin,
An’ thy auld days may end in starvin;
For my last fow,
A heapit stimpart, I’ll reserve ane
Laid by for you.

We’ve worn to crazy years thegither;
We’ll toyte about wi’ ane anither;
Wi’ tentie care I’ll flit thy tether
To some hain’d rig,
Whare ye may nobly rax your leather,
Wi’ sma’ fatigue.

Read all of Robert Burns's poems · About Robert Burns

More by Robert Burns

  • A Winter Night
  • The Vision
  • Epistle to Davie, a Brother Poet
  • Epistle to J. Lapraik, an Old Scottish Bard
  • Poor Mailie's Elegy

Write poetry? Submit your poem to Poetry Catalog

Share this:

  • Share on Facebook (Opens in new window) Facebook
  • Share on X (Opens in new window) X
  • Share on Reddit (Opens in new window) Reddit
  • Share on Tumblr (Opens in new window) Tumblr
  • Share on Pinterest (Opens in new window) Pinterest

Related

Filed Under: Poems

Get Every Post In Your Inbox 😳

Enter your email address to subscribe to this blog and receive notifications of new posts by email.
(This is not the newsletter.)

Primary Sidebar

Never Miss A Poem (Newsletter)

Be Social

  • X
  • Facebook
  • Pinterest

Top Posts & Pages

  • Poetry Submission Deadlines November 2026
    Poetry Submission Deadlines November 2026
  • Hope Is the Thing with Feathers Summary and Analysis
    Hope Is the Thing with Feathers Summary and Analysis
  • The picturesque dreameries, By: Pawel Markiewicz
    The picturesque dreameries, By: Pawel Markiewicz
  • A Bird Is Of All Beings, By: Emily Dickinson
    A Bird Is Of All Beings, By: Emily Dickinson
  • Ode to the West Wind Summary and Analysis
    Ode to the West Wind Summary and Analysis
  • The Coming Of Night, By: Emily Dickinson
    The Coming Of Night, By: Emily Dickinson
  • Poetry Submission Deadlines December 2026
    Poetry Submission Deadlines December 2026
  • Mother Nature, By: Emily Dickinson
    Mother Nature, By: Emily Dickinson
  • Fame Is a Fickle Food Summary and Analysis
    Fame Is a Fickle Food Summary and Analysis
  • What I Can Do I Will, By: Emily Dickinson
    What I Can Do I Will, By: Emily Dickinson

Advertising/Subscribing = Loving

Buy Me A Coffee

Footer

Made with ❤ in Lubbock, TX.

Public Domain Poetry

Poetry Catalog Sponsors

Haiku Examples

Search

Copyright © 2026 · Magazine Pro on Genesis Framework · WordPress · Log in